ලෝක මලල ක්රීඩා පිටියේ ශ්රී ලංකාව වෙනුවෙන් ඉතිහාසගත දස්කම් දැක්වූ හෙල්ල විසිකිරීමේ ශූර රුමේෂ් තරංග පතිරගේ, සිය ජයග්රාහී තරග ගමන අවසන් කර අද අලුයම ශ්රී ලංකාවට පැමිණ තිබෙනවා.
ඔහු Turkish Airlines හි TK-730 ගුවන් යානයෙන් අද අලුයම 5.10ට කටුනායක බණ්ඩාරනායක ජාත්යන්තර ගුවන්තොටුපළ වෙත පැමිණ ඇති අතර, ගුවන් ගමන අතරතුර ඔහු රැගෙන ආ තරග හෙල්ල 5ම කැඩී හානි වී ඇති බව වාර්තා වනවා.
මෙය විශේෂයෙන්ම කනගාටුදායක කරුණක් වී ඇත්තේ එම හෙල්ල ඔහුගේ මේ වසරේ ලෝක මට්ටමේ ජයග්රහණ කිහිපයකට භාවිත කළ හෙල්ල වීම හේතුවෙන්.
ඒ අතර Budapest හිදී මීටර් 91.09ක දුරක් විසි කරමින් World Athletics Ultimate Championship ජයගත් අවස්ථාවේ භාවිත කළ හෙල්ලක්ද, Zurich Diamond League තරගයේදී මීටර් 92.07ක් විසි කළ අවස්ථාවේ භාවිත කළ හෙල්ලක්ද තිබෙන බව වාර්තා වනවා.
රුමේෂ්ගේ 2026 වසරේ දස්කම් සැලකීමේදී මෙම හෙල්ලවල වටිනාකම තවත් පැහැදිලි වෙනවා. ඔහු Rome Diamond League තරගයේදී මීටර් 92.62ක ශ්රී ලංකා වාර්තාවක් පිහිටුවා ඇති අතර, එය මේ වසරේ ඔහුගේ හොඳම දස්කමයි. World Athletics දත්ත අනුව 2026 වසරේ පිරිමි හෙල්ල විසිකිරීමේ ලෝක ශ්රේණිගත කිරීමේ ඔහු අංක එකේ පසුවනවා.
ඉන් අනතුරුව Zurich හිදී මීටර් 92.07ක් විසි කරමින් තවත් Diamond League ජයග්රහණයක් ලබාගත් රුමේෂ්, පසුව Brussels හිදී මීටර් 89.04ක දස්කමක් දක්වමින් ශ්රී ලංකාවේ පළමු Diamond League Champion බවට පත්වුණා.
අවසන් වශයෙන් Budapest හි පැවති World Athletics Ultimate Championship තරගයේදී ඔහු අවසන් වටයේ මීටර් 91.09ක දැවැන්ත විසි කිරීමක් සිදුකරමින් ශූරතාව දිනාගත්තා.
ගුවන්තොටුපළේදී අදහස් දක්වමින් රුමේෂ් මෙම සිදුවීම සම්බන්ධයෙන් දැඩි කනගාටුව පළ කර ඇති බව වාර්තා වනවා. ඔහුට අනුව මෙම හෙල්ල ඉදිරි ප්රධාන තරග සඳහාද භාවිත කිරීමට සැලසුම් කර තිබූ අතර, තම ක්රීඩා දිවියේ මතක සටහන් ලෙසද ඒවා ආරක්ෂා කර ගැනීමට ඔහුට අවශ්ය වී තිබුණා.
මෙම සිදුවීම සම්බන්ධයෙන් Turkish Airlines වෙත නිල පැමිණිල්ලක් ඉදිරිපත් කිරීමට රුමේෂ් පියවර ගෙන ඇති බවද වාර්තා වනවා
