ලෝකයේ ප්රථම වරට ස්වේච්ඡාවෙන් ජීවිතය තොර කරගැනීමේ Voluntary Assisted Dying (VAD) නීතිය යටතේ Darwin හිදී Bob Dent නමැති පිළිකා රෝගියාට සහාය දැක්වූ Dr Philip Nitschke, වසර තිහකට පසුව Northern Territory හි නැවතත් එම නීති සම්මත වීම පිළිබඳව සිය සතුට පළ කරනවා. 1995 වසරේදී මෙම නීතිය හඳුන්වා දෙමින් ලෝකයටම ආදර්ශයක් වූ Northern Territory, වසර 1997 දී John Howard ගේ රජය විසින් එය අහෝසි කිරීමෙන් පසුව, ඕස්ට්රේලියාවේ නැවතත් එම නීතිය බලගැන්වූ අවසාන ප්රදේශය බවට පත්වීම විශේෂත්වයක්.
කෙසේ වෙතත්, මෙවර සම්මත වූ නීතිය ඉතා සංරක්ෂණශීලී එකක් බව පවසන Dr Nitschke, රෝගියෙකු මිය යාමට මාස 12 කට අඩු කාලයක් ඇති බවට වෛද්යවරයෙකු සහතික කළ යුතු බවට පනවා ඇති කොන්දේසිය පිළිබඳව සිය කනගාටුව පළ කරනවා. මෙවැනි කෙටි කාලයක් නිවැරදිව අනාවැකි කීම වෛද්යවරුන්ට පවා අතිශය අපහසු එකක් බවයි Exit International සංවිධානයේ ප්රධානියා වන ඔහු පෙන්වා දෙන්නේ. ඊට අමතරව South Australia මෙන්ම Northern Territory හිද වෛද්යවරුන්ට මේ පිළිබඳව රෝගීන් සමඟ මුලින් සාකච්ඡා කිරීම තහනම් කර තිබෙනවා.
මෙම නීතිය සම්බන්ධයෙන් Northern Territory හි ජනතාව අතරද විවිධ මත පළවනවා. අසාධ්ය පිළිකා රෝගයකින් පෙළෙන Darwin හි Dave Collins පවසන්නේ මාස 12 සීමාව නිසා තමන්ට මෙම සහනය ලබා ගැනීමට නොහැකි වනු ඇති බවයි. නමුත් තම සහෝදරිය Victoria හි මෙම නීතිය යටතේ වේදනාවෙන් තොරව සමුගත් ආකාරය මතක් කරන Eileen, මෙය ඉතා වටිනා පියවරක් ලෙස දකින අතරම මාස 12 සීමාව ප්රායෝගික නැති බව පවසනවා. 1995 නීතියේ නිර්මාතෘවරයා වන හිටපු අමාත්ය Marshall Perron ද මෙම සීමාවන් විවේචනය කරද්දී, Australian Christian Lobby හි Nicholas Lay ප්රකාශ කළේ මිනිස් ජීවිත නැති කිරීමට නීතිමය ඉඩකඩ සැලසීම කනගාටුදායක බවයි. මෙම නව නීතිය තවත් මාස 18 කින් ක්රියාත්මක වීමට නියමිත අතර වසර තුනකට පසුව එය නැවත සමාලෝචනය කිරීමට නියමිතයි.
