නේපාලයට සහ ටිබෙට් කලාපයට බලපා ඇති දරුණු හදිසි ගංවතුර තත්ත්වය හේතුවෙන් Michael Keats නමැති ඕස්ට්රේලියානු ජාතිකයා ජීවිතක්ෂයට පත්ව ඇති බව තහවුරු වී තිබෙනවා. ඔහු මෙම ආපදාවෙන් මියගිය පළමු ඕස්ට්රේලියානු ජාතිකයායි.
NSW south coast හි පදිංචිකරුවෙකු වන Michael, ඉන්දියාවේ පැවැත්වෙන ආධ්යාත්මික වැඩසටහන සහභාගී වීමට යමින් සිටියදී මෙම අවාසනාවන්ත අනතුරට මුහුණ දී තිබෙනවා. මේ වන විට මරණ සංඛ්යාව 900 ඉක්මවා ඇති අතර, අතුරුදහන් වූ 40කට වැඩි ඕස්ට්රේලියානු ජාතිකයින් ඇතුළු පිරිස් සෙවීමේ මෙහෙයුම් තවදුරටත් ක්රියාත්මකයි.
විශේෂයෙන්ම නේපාලයේ ජලවිදුලි උමං මාර්ග තුළ සිරවී සිටින පිරිස් මුදවාගැනීමට ජාත්යන්තර සහන කණ්ඩායම් දැඩි උත්සාහයක නිරත වනවා. ඕස්ට්රේලියානු කැණීම් විශේෂඥ Professor Arnold Dix සඳහන් කළේ එක් විදුලි බලාගාර උමඟක් තුළ පමණක් 40කට ආසන්න පිරිසක් තවමත් ජීවතුන් අතර සිටින බවට විශ්වාස කරන බවයි.
විපතට පත් Rasuwa district කලාපයේ ඕස්ට්රේලියානු ජාතිකයින් රැසක් සිට ඇති අතර, ඔවුන්ගේ ඥාතීන් ද මේ වන විට නේපාලය වෙත පැමිණෙමින් සිටිනවා. ඕස්ට්රේලියානු අගමැති Anthony Albanese ප්රකාශ කළේ ඉදිරි දින කිහිපය තුළ ඕස්ට්රේලියානු ගුවන් හමුදාව මගින් නේපාලය වෙත අත්යවශ්ය සහනාධාර තොග යැවීමට කටයුතු යොදා ඇති බවයි.
මේ අතර, අවතැන් වූ පිරිස් වෙනුවෙන් පාසල් තුළ තාවකාලික කඳවුරු ඉදි කර ඇති අතර, ආහාර සහ සෞඛ්ය පහසුකම් සැපයීම පිළිබඳව සහන සංවිධාන දැඩි අවධානය යොමු කර තිබෙනවා. Emergency Action Alliance ආයතනය ඔස්සේ විපතට පත් නේපාල ජනතාවට ආධාර ලබාදීමට හැකියාව පවතිනවා.
